နှလုံးရောဂါ ဆိုတာကတော့ ကမ္ဘာပေါ်မှာ အဖြစ်အများဆုံး ရောဂါတစ်မျိုးပဲ ဖြစ်ပါတယ်။ ဒါကြောင့် နှလုံးနဲ့သက်ဆိုင်တဲ့ ရောဂါတွေ ဖြစ်ပွားခြင်းကနေ ကာကွယ်ပြီး နှလုံးကျန်းမာရေးကို ကောင်းမွန်စေဖို့ အတွက် စားသုံးသင့်တဲ့ အစားအစာတွေကို Careme ပရိသတ်ကြီးအတွက် ဖော်ပြပေးလိုက်ပါတယ်။

• ကညွတ် (Asparagus)

ကညွတ်မှာ ပါဝင်တဲ့ ဖိုလိတ်အက်စစ်က ကျွန်တော်တို့ ခန္ဓာကိုယ်အတွင်းက Homocysteine ပမာဏကို လျော့ကျစေမှာ ဖြစ်တာကြောင့် နှလုံးနဲ့သက်ဆိုင်တဲ့ ရောဂါတွေ ဖြစ်ပွားမှုနဲ့ လေဖြတ်ဝေဒနာ ဖြစ်ပွားမှုတို့ကို ကာကွယ်ပေးသွားမှာ ဖြစ်ပါတယ်။

• ပဲများ

ပဲတွေမှာ အမျှင်ဓါတ်၊ ပရိုတိန်းနဲ့ အန်တီအောက်ဆီဒန့်တွေ ပါဝင်တာကြောင့် နှလုံးကျန်းမာရေးကို အထောက်အကူဖြစ်စေမှာ ဖြစ်တဲ့အပြင် အခြားသော ရောဂါဝေဒနာတွေ ဖြစ်ပွားခြင်း မရှိအောင်လည်း ကာကွယ်ပေးသွားမှာ ဖြစ်ပါတယ်။

• ဘယ်ရီသီးများ

ဘယ်ရီသီးတွေမှာ အမျှင်ဓါတ်၊ ဖိုလိတ်အက်စစ်၊ သံဓါတ်၊ ကယ်ဆီယမ်၊ ဗီတာမင် A နဲ့ ဗီတာမင် C တို့ ပါဝင်တာကြောင့် နှလုံးရောဂါဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။

• ဂေါ်ဖီစိမ်း

ဂေါ်ဖီစိမ်းကို နေ့စဉ်ပုံမှန် စားသုံးခြင်းဖြင့် ခန္ဓာကိုယ်အတွင်းမှ ကိုလက်စထရော ပမာဏကို လျော့ချပေးနိုင်မှာ ဖြစ်တဲ့အပြင် နှလုံးရောဂါ ဖြစ်ပွားမှုကိုလည်း ကာကွယ်ပေးနိုင်မှာ ဖြစ်ပါတယ်။

• ချောကလက် (အခါး)

ချောကလက်အခါး (Dark Chocolate) ကို နေ့စဉ်ပုံမှန် စားသုံးခြင်းဖြင့် လေဖြတ်ခြင်းနဲ့ နှလုံးရောဂါ ဖြစ်ပွားမှုတွေကို ကာကွယ်ပေးနိုင်မှာ ဖြစ်ပါတယ်။

• ကော်ဖီ

ချောကလက်အခါးလိုပဲ ကော်ဖီကို နေ့စဉ်ပုံမှန် သောက်သုံးမယ် ဆိုရင်လည်း နှလုံးရောဂါ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။

• အိုမီဂါ ၃ အက်စစ် ပါဝင်သောငါးများ

အိုမီဂါ ၃ အက်စစ် ပါဝင်တဲ့ ဆဲလ်မွန်၊ တူနာစတဲ့ငါးတွေကို နေ့စဉ်ပုံမှန် စားသုံးပေးမယ်ဆိုရင် ရုတ်တရက် နှလုံးဖောက်ခြင်း၊ နှလုံးခုန်မူမမှန်ခြင်းစတဲ့ ဝေဒနာတွေကို ကာကွယ်ပေးနိုင်မှာ ဖြစ်ပါတယ်။

• အစေ့အဆံများ

ဗံဒါသီး၊  သစ်အယ်သီး၊ မြေပဲ၊ သစ်ချသီးစတဲ့ အစေ့အဆံတွေမှာ အမျှင်ဓါတ်၊ ပရိုတိန်း၊ သတ္တုဓါတ်၊ ဗီတာမင်နဲ့ အန်တီအောက်ဆီဒန့်တွေ ပါဝင်တာကြောင့် နေ့စဉ် ပုံမှန်စားသုံးပေးမယ်ဆိုရင် နှလုံးကျန်းမာရေးအတွက် အထောက်အကူဖြစ်စေမှာ အသေအချာပါပဲ။

• ခရမ်းချဉ်သီး

ခရမ်းချဉ်သီးမှာ နှလုံးကျန်းမာရေးအတွက်‌ ကောင်းမွန်စေတဲ့ အမျှင်ဓါတ်၊ ပိုတက်ဆီယမ်၊ ဗီတာမင် C၊ ဖိုလိတ်အက်စစ်နဲ့ ချိုလိုင်း (Choline) တို့ ပါဝင်တာကြောင့် နေ့စဉ်ပုံမှန် စားသုံးပေးသင့်ပါတယ်။

REF: MedicalNewsToday