အသီးအနှံကို နေ့စဉ်ပုံမှန်စားသုံးခြင်းက ကျွန်တော်တို့ခန္ဓာကိုယ် သက်ရှည်ကျန်းမာစေဖို့အတွက် အကျိုးရလဒ်ကောင်းတွေ ဖြစ်ပေါ်စေတာကို လူတိုင်းသိပြီးကြပြီ ဖြစ်ပါတယ်။ ဒီတော့ အသီးအနှံမျိုးနွယ်ဝင်ထဲမှာ တစ်ခု အပါအဝင်ဖြစ်တဲ့ ဂေါ်ဖီစိမ်းကိုစားသုံးခြင်းကြောင့် ရရှိနိုင်တဲ့ အကျိုးကျေးဇူးတွေကို တစ်ချက်လောက် လေ့လာကြည့်လိုက်ရအောင်။

• ကင်ဆာရောဂါကိုကာကွယ်ပေးခြင်း

ဂေါ်ဖီစိမ်းမှာ Sulforaphane ဓာတ်ပါဝင်တာကြောင့် အဆုတ်ကင်ဆာ၊ အူမကြီးကင်ဆာစတဲ့ ကင်ဆာရောဂါ ဖြစ်ပွားမှုတွေကို ကာကွယ်ပေးနိုင်ပါတယ်။ ဒါ့အပြင် ဂေါ်ဖီစိမ်းမှာ ဖိုလိတ် (Folate) ဓာတ်ပါဝင်တာကြောင့် အမျိုးသမီးတွေမှာ ဖြစ်ပွားလေ့ရှိတဲ့ ရင်သားကင်ဆာ ဖြစ်ပွားမှုကိုလည်း ကာကွယ်ပေးနိုင်သလို အစာအိမ်ကင်ဆာ၊ ပန်ကရိယကင်ဆာစတဲ့ ကင်ဆာရောဂါတွေကိုလည်း ကာကွယ်ပေးနိုင်ပါတယ်။

• အရိုးအဆစ်တွေကို ကျန်းမာသန်စွမ်းစေခြင်း

ကျွန်တော်တို့ ခန္ဓာကိုယ်အတွင်းမှာ ဗီတာမင် K ဓာတ်လျော့နည်းသွားခဲ့မယ်ဆိုရင် အရိုးအစစ်များ ကွဲအက်ခြင်းကို ဖြစ်ပွားစေနိုင်ပါတယ်။ ဂေါ်ဖီစိမ်းမှာ ဗီတာမင် K ကြွယ်ဝစွာ ပါဝင်တာကြောင့် အရိုးအဆစ်တွေကို ကျန်းမာသန်စွမ်းစေမှာ ဖြစ်ပါတယ်။

• ငယ်ရွယ်နုပျိုစေခြင်း

ကျွန်တော်တို့ လူသားတွေ အနေနဲ့ ဗီတာမင် C ကို အချဉ်ကဲတဲ့ အသီးအနှံတွေမှာသာ ပါဝင်တယ်လို့ သိထားကြပါတယ်။ ဒါပေမယ့် ဂေါ်ဖီစိမ်းမှာလည်း ဗီတာမင် C ဓာတ်ကြွယ်ဝစွာ ပါဝင်တာကြောင့် နေလောင်ဒဏ်ကြောင့် အသားအရေပျက်စီးခြင်း၊ အသားအရေရွတ်တွခြင်းတို့ကို ကာကွယ်ပေးနိုင်မှာ ဖြစ်ပါတယ်။ ဒါ့အပြင် ဂေါ်ဖီစိမ်းမှာ ဗီတာမင် A၊ ဗီတာမင် E တို့ပါဝင်တာကြောင့် အသားအရေကို စိုပြေဝင်းလက်နေစေမှာ ဖြစ်ပါတယ်။

• အစာကြေလွယ်စေခြင်း

ဂေါ်ဖီစိမ်းမှာ အမျှင်ဓာတ်ကြွယ်ဝစွာ ပါဝင်တာကြောင့် ဝမ်းချုပ်ခြင်းဝေဒနာကို ကာကွယ်ပေးမှာဖြစ်သလို အစာအိမ်နဲ့အူလမ်းကြောင်းဆိုင်ရာ ရောဂါများ ဖြစ်ပွားခြင်းကိုလည်း ဟန့်တားပေးသွားမှာ ဖြစ်ပါတယ်။ ဒါ့အပြင် အမျှင်ဓါတ်ပါဝင်တဲ့ အသီးအနှံတွေကို နေ့စဉ်ပုံမှန်စားသုံးပေးမယ်ဆိုရင် အူလမ်းကြောင်းအတွင်းမှ အညစ်အကြေးများကိုလည်း ရှင်းလင်းဖယ်ရှားပေးသွားမှာ ဖြစ်ပါတယ်။

• နှလုံးရောဂါကိုကာကွယ်ပေးခြင်း

ဒါ့အပြင် ဂေါ်ဖီစိမ်းကို နေ့စဉ်ပုံမှန်စားသုံးပေးမယ်ဆိုရင် နှလုံးရောဂါ၊ လေဖြတ်ဝေဒနာ၊ ဆီးချိုရောဂါ၊ အဝလွန်ခြင်းစတဲ့ရောဂါတွေ ဖြစ်ပွားမှုကိုလည်း ကာကွယ်ပေးနိုင်မှာ ဖြစ်ပါတယ်။

REF: MedicalNewsToday