သွားကျဉ်ခြင်း ဆိုတာကတော့ အေးစက်တဲ့ အစားအစာတွေ၊ ပူနွေးတဲ့ အစားအစာတွေကို စားသုံးလိုက်တဲ့ အခါမှာ ဒါမှမဟုတ် ချဉ်လွန်းတဲ့ အစားအစာတွေ၊ ချိုလွန်းတဲ့ အစားအစာတွေကို စားသုံးလိုက်တဲ့ အခါမှာ သွားထဲက ကျဉ်တက်လာခြင်းကို ဆိုလိုတာပဲ ဖြစ်ပါတယ်။ သွားကျဉ်ခြင်းကို ဖြစ်ပွားစေတဲ့ အကြောင်းအရင်းတွေကတော့ အောက်ပါအတိုင်းပဲ ဖြစ်ပါတယ်။

• သွားများကို ခပ်ကြမ်းကြမ်း ဖိတိုက်ခြင်း

သွားများကို မကြာခဏ ဖိတိုက်ခြင်း၊ သွားပွတ်တံ အမာများကို အသုံးပြုခြင်းတို့ကြောင့် အပေါ်ယံကြွေသွားလွှာ ပျက်စီးသွားမှာ ဖြစ်တာကြောင့် သွားကျဉ်ခြင်းကို ဖြစ်ပွားစေတာပဲ ဖြစ်ပါတယ်။

• အက်စစ်ဓာတ် လွန်ကဲသော အစားအစာများ စားသုံးခြင်း

အက်စစ်ဓာတ် လွန်ကဲတဲ့ အစားအစာတွေဖြစ်တဲ့ ခရမ်းချဉ်သီးဆော့စ်၊ သံပုရာသီး၊ ရှောက်သီး၊ ကီဝီသီးတို့ကို မကြာခဏ စားသုံးတဲ့ အခါမှာ အဆိုပါ အစားအစာတွေမှာ ပါဝင်တဲ့ အက်စစ်ဓာတ်က အပေါ်ယံကြွေသွားလွှာကို ပျက်စီးစေမှာ ဖြစ်တာကြောင့် သွားကျဉ်ခြင်းကို ဖြစ်ပွားစေမှာ ဖြစ်ပါတယ်။

• သွားကြိတ်တတ်ခြင်း

တကယ်လို့ သင့်အနေနဲ့ မကြာခဏ သွားကြိတ်လေ့ ရှိမယ်ဆိုရင် သွားအပေါ်ယံ ကြွေသွားလွှာတွေ ပျက်စီးသွားမှာ ဖြစ်တာကြောင့် သွားကျဉ်ခြင်းကို ခံစားရမှာ ဖြစ်ပါတယ်။ သင့်အနေနဲ့ သွားကြိတ်ခြင်း အလေ့အထကို ဖျောက်ဖျက်နိုင်စွမ်း မရှိဘူးဆိုရင် သက်ဆိုင်ရာ ဆရာဝန်နဲ့ ပြသပြီး သွားကြိတ်ခြင်း ဝေဒနာကို ဂရုတစိုက် ကုသမှု ခံယူသင့်ပါတယ်။

• သွားဖြူစေသော သွားတိုက်ဆေးများ အသုံးပြုခြင်း

သွားဖြူစေတဲ့ သွားတိုက်ဆေးတွေမှာ ပါဝင်တဲ့ ဓာတုဗေဒပစ္စည်းတွေနဲ့ ဓာတ်မတည့်တဲ့ အခါမှာလည်း သွားကျဉ်ခြင်းကို ဖြစ်ပွားစေမှာ ဖြစ်ပါတယ်။

• ပါးစပ်ဆေးရည်ကို မကြာခဏ အသုံးပြုပြီး ပလုပ်ကျင်းခြင်း

ပါးစပ်ဆေးရည်တွေမှာ အရက်နဲ့ ဓာတုဗေဒပစ္စည်းတွေ ပါဝင်တာကြောင့် သွားရဲ့အပေါ်ယံ ကြွေသွားလွှာကို ပျက်စီးစေမှာဖြစ်ပြီး သွားကျဉ်ခြင်းကို ဖြစ်ပွားစေမှာ ဖြစ်ပါတယ်။ ဒါကြောင့် အရက်နဲ့ ဓာတုဗေဒပစ္စည်းတွေ ပါဝင်တဲ့ ပါးစပ်ဆေးရည်တွေ အသုံးပြုခြင်းကို ရှောင်ရှားပြီး ဖလိုရိုက် ပါဝင်တဲ့ ပါးစပ်ဆေးရည်တွေကိုသာ အသုံးပြုသင့်ပါတယ်။

• သွားဖုံးရောဂါ ခံစားနေရခြင်း

တစ်ခါတရံမှာ သွားဖုံးရောဂါတွေဖြစ်တဲ့ သွားဖုံးရောင်ခြင်း၊ သွားဖုံးရေစီးကမ်းပြိုလိုက်ခြင်းစတဲ့ ဝေဒနာတွေကို ခံစားရတဲ့အခါမှာလည်း သွားကျဉ်ခြင်းကို ဖြစ်ပွားစေနိုင်ပါတယ်။ ဒါ့အပြင် သွားပိုးစားခြင်း၊ သွားကျိုးခြင်း၊ သွားပဲ့ခြင်းစတဲ့ ဝေဒနာတွေ ခံစားရတဲ့ အခါမှာလည်း သွားကျဉ်ခြင်းကို ခံစားရနိုင်ပါတယ်။

• သွားချေးတက်ခြင်း

သွားတွေမှာ ချေးညှော်တွေနဲ့ ပြည့်နှက်နေခဲ့မယ်ဆိုရင် အပေါ်ယံ ကြွေသွားလွှာ ပျက်စီးသွားမှာဖြစ်ပြီး သွားအာရုံကြောကို ထိခိုက်စေမှာ ဖြစ်တာကြောင့် သွားကျဉ်ခြင်းကို ခံစားရမှာ ဖြစ်ပါတယ်။

သွားကျဉ်ခြင်းကို အလွယ်တကူ သက်သာပျောက်ကင်းစေမယ့် နည်းလမ်းတွေကတော့ အောက်ပါအတိုင်းပဲ ဖြစ်ပါတယ်။

• ဆီနဲ့ပလုပ်ကျင်းခြင်း (Oil Pulling)

နှမ်းဆီ ဒါမှမဟုတ် အုန်းဆီနဲ့ ပလုပ်ကျင်းပေးခြင်းဖြင့် သွားကျဉ်ခြင်းကို သက်သာပျောက်ကင်းစေမှာ ဖြစ်ပါတယ်။ လေ့လာတွေ့ရှိချက်တွေအရ ဆီနဲ့မကြာခဏ ပလုပ်ကျင်းပေးခြင်းဖြင့် သွားကျဉ်ခြင်းအပြင် သွားဖုံး‌ရောင်ခြင်းကိုလည်း သက်သာပျောက်ကင်းစေမှာ ဖြစ်တယ်လို့ သိရပါတယ်။

• မာလကာရွက် ဝါးပေးခြင်း

မာလကာရွက်ကို ဝါးပေးခြင်းဖြင့် သွားကျဉ်ခြင်း၊ သွားနာခြင်း၊ သွားဖုံးရောင်ရမ်းခြင်းစတဲ့ ဝေဒနာတွေ ဖြစ်ပွားမှုကို ကာကွယ်နိုင်မှာ ဖြစ်ပါတယ်။

• လေးညှင်းပွင့် စားပေးခြင်း

လေးညှင်းပွင့်ကို နေ့စဉ်ပုံမှန် စားသုံးပေးခြင်းဖြင့် ခန္ဓာကိုယ်ရဲ့ ခုခံအားစနစ်ကို ကောင်းမွန်စေမှာဖြစ်သလို သွားကျဉ်ခြင်း၊ သွားနာခြင်းများကိုလည်း သက်သာပျောက်ကင်းစေမှာ ဖြစ်ပါတယ်။

• ကြက်သွန်ဖြူ

ကြက်သွန်ဖြူကို လူသားတွေရဲ့ ကျန်းမာရေးကို အထောက်အကူ ဖြစ်စေတဲ့ အာဟာရဓာတ်ပေါင်း များစွာ ပါဝင်ပါတယ်။ ကြွက်သွန်ဖြူကို ဝါးစားလိုက်တဲ့ အခါမှာ ထွက်ပေါ်လာလေ့ရှိတဲ့ Allicin ဒြပ်ပေါင်းအနေနဲ့ ခံတွင်း ကျန်းမာရေးကို ထိခိုက်စေနိုင်တဲ့ ဘက်တီးရီးယားပိုးတွေကို ဖယ်ရှားပေးမှာ ဖြစ်သလို သွားကျဉ်ခြင်း၊ သွားပိုးစားခြင်းစတဲ့ ဝေဒနာတွေ ဖြစ်ပွားမှုကိုလည်း ကာကွယ်ပေးသွားမှာ ဖြစ်ပါတယ်။

• ဆားငံရည်ဖြင့် ပလုပ်ကျင်းပေးခြင်း

ဆားငံရည်ဖြင့် ပလုပ်ကျင်းပေးဖြင့် ခံတွင်းသန့်ရှင်းရေးကို ကောင်းမွန်စေမှာ ဖြစ်သလို သွားချေးတက်ခြင်း၊ သွားကျဉ်ခြင်း၊ သွားနာခြင်းစတဲ့ ဝေဒနာတွေကိုလည်း သက်သာပျောက်ကင်းစေမှာ ဖြစ်ပါတယ်။

REF: EverydayHealth, HealthLine, MedicalNewsToday