ခြေထောက်မှာ သွေးစီးဆင်းမှု နည်းပါးခြင်းကြောင့် ခြေထောက် ကြွက်သားများ နာကျင်ခြင်းကို ဖြစ်ပွားစေနိုင်ပါတယ်။ လေ့ကျင့်ခန်းတွေ အပြင်းအထန် ပြုလုပ်ခြင်းကြောင့် ခြေထောက် ကြွက်သားများ နာကျင်ခြင်းကို ခံစားရလေ့ ရှိပေမယ့် လေ့ကျင့်ခန်း ပြုလုပ်မှုကို ရပ်တန့်လိုက်ပြီး အနားယူလိုက်တဲ့ အခါမှာတော့ ခြေထောက် ကြွက်သားများ နာကျင်ခြင်း ဝေဒနာလည်း သက်သာပျောက်ကင်းသွားမှာ ဖြစ်ပါတယ်။

ခြေထောက် ကြွက်သားများ နာကျင်ခြင်းကို ခံစားရတဲ့အခါမှာ -

• မကြာခဏ ခြေထောက်နာခြင်း
• ကြွက်တက်ခြင်း
• ပြည်တည်နာဖြစ်ခြင်း
• ခြေဖဝါးအေးခြင်း
• ခြေဖဝါး ယားယံခြင်း
• ခြေထောက်ကိုက်ခဲခြင်းစတဲ့ ဝေဒနာတွေကို ခံစားရနိုင်ပါတယ်။

ခြေထောက် ကြွက်သားများ နာကျင်ခြင်းကို အဓိက ဖြစ်ပွားစေတဲ့ အကြောင်းအရင်းကတော့ သွေးကြောကျဉ်းခြင်း (Atherosclerosis) ကြောင့်ပဲ ဖြစ်ပါတယ်။ ဒါ့အပြင် -

• ဆေးလိပ်သောက်ခြင်း
• သွေးတွင်း ကိုလက်စထရော (Cholesterol) ပမာဏ မြင့်တက်ခြင်း
• သွေးပေါင်တက်ခြင်း
• အဝလွန်ခြင်း
• ဆီးချိုရောဂါ ဖြစ်ပွားခြင်း
• အသက်အရွယ်ကြီးမြင့်ခြင်း
• မျိုးရိုးလိုက်ခြင်းတို့ကြောင့်လည်း ခြေထောက် ကြွက်သားများ နာကျင်ခြင်းကို ဖြစ်ပွားစေနိုင်ပါတယ်။

ခြေထောက် ကြွက်သားများ နာကျင်ခြင်းကို ကာလရှည် ခံစားရတဲ့ အခါမှာ ခြေထောက် ကြွက်သားတွေအပြင် ပေါင်တံ၊ တင်ပါးဆုံ၊ တင်ပါး၊ ခြေဖဝါး ကြွက်သားတွေ နာကျင်ကိုက်ခဲမှုကိုပါ ခံစားရနိုင်ပါတယ်။

တကယ်လို့ ခြေထောက် ကြွက်သားများ နာကျင်ခြင်းကို ကာကွယ်ချင်တယ် ဆိုရင်တော့ အောက်ပါ နည်းလမ်းတွေကို လိုက်နာဆောင်ရွက်သင့်ပါတယ်။

• ဆေးလိပ်ဖြတ်ခြင်း
• လေ့ကျင့်ခန်းပုံမှန် လုပ်ဆောင်ပေးခြင်း
• သွေးတွင်း သကြားဓာတ်ကို ထိန်းညှိပေးခြင်း
• အဆီများတဲ့ အစားအစာများ စားသုံးမှုကို ရှောင်ကြဉ်ခြင်း
• ကိုယ်အလေးချိန်ကို ထိန်းညှိခြင်း
• သွေးတွင်း ကိုလက်စထရော (Cholesterol) ပမာဏကို ထိန်းညှိခြင်း

REF: MayoClinic, MedicalNewsToday