သုက်လွှတ်မြန်ခြင်း (သုက်လွှတ်စောခြင်း) ဆိုတာကတော့ ချစ်တင်းနှောပြီး တစ်မိနစ်၊ နှစ်မိနစ်အတွင်း ဆန္ဒပြီးမြောက်ကာ သုက်ထွက်သွားခြင်းကို ဆိုလိုတာပဲ ဖြစ်ပါတယ်။ လေ့လာတွေ့ရှိချက်တွေအရ အသက် (၁၈) နှစ်နဲ့ (၅၉) နှစ်အကြား အမျိုးသား အများစုအနေနဲ့ သုက်လွှတ်မြန်ခြင်း ပြဿနာနဲ့ ရင်ဆိုင်နေရတယ်လို့ သိရပါတယ်။

သုက်လွှတ်မြန်ခြင်းကို ခံစားနေရတဲ့ အခါမှာ -

• ထိုးသွင်းပြီး စက္ကန့်ပိုင်းအတွင်း သုက်ထွက်သွားခြင်း
• မထိုးသွင်းခင်ကပင် သုက်ထွက်သွားခြင်း
• ပွေ့ဖက်နမ်းရှုံတာနဲ့ သုက်ထွက်ခြင်း
• သုက်မထွက်အောင် ထိန်းချုပ်ထားနိုင်မှု မရှိခြင်း
• အိမ်ထောင်ရေးသုခ အပြည့်အဝ ခံစားနိုင်မှု မရှိခြင်း
• သိမ်ငယ်စိတ်ဖြစ်ခြင်းစတဲ့ ဆိုးကျိုးတွေကို ခံစားရနိုင်ပါတယ်။

သုက်လွှတ်မြန်ခြင်းကို အဓိက ဖြစ်ပွားစေတဲ့ အချက်တွေကတော့ -

• ကာမဆက်ဆံမှုနဲ့ ပတ်သတ်ပြီး အတွေ့အကြုံမရှိခြင်း
• စိုးရိမ်စိတ်လွန်ကဲခြင်း
• စိတ်ကျဝေဒနာ ခံစားနေရခြင်း
• လိင်ပိုင်းဆိုင်ရာ စော်ကားခံခဲ့ရခြင်း
• မကြာခဏ တစ်ကိုယ်ရည် အာသာဖြေခြင်းတို့ကြောင့်ပဲ ဖြစ်ပါတယ်။

ဒါ့အပြင် ဆီးချိုရောဂါ၊ အာရုံကြောရောဂါ၊ ဆီးကျိတ်ရောင်ခြင်း၊ ဆီးလမ်းကြောင်းပိုးဝင်ခြင်းစတဲ့ ရောဂါတွေကြောင့် သုက်လွှတ်မြန်ခြင်းကို ခံစားရနိုင်ပြီး အရက်အလွန်အကျွံ သောက်သုံးခြင်းကြောင့်လည်း သုက်လွှတ်မြန်ခြင်းကို ခံစားရနိုင်ပါတယ်။

သုက်လွှတ်မြန်ခြင်းကို အလွယ်တကူ ကုသနိုင်မယ့် နည်းလမ်းတွေကတော့ အောက်ပါအတိုင်းပဲ ဖြစ်ပါတယ်။

• တင်ပါးဆုံကြွက်သား လေ့ကျင့်ခန်းများ လုပ်ဆောင်ပေးခြင်း

တင်ပါးဆုံ ကြွက်သားများ သန်မာခြင်း မရှိတဲ့အခါမှာ သုက်ထွက်မြန်ခြင်းကို ဖြစ်ပွားစေနိုင်ပါတယ်။ ဒါကြောင့် တင်ပါဆုံး ကြွက်သားများ သန်မာစေမယ့် လေ့ကျင့်ခန်းတွေကို နေ့စဉ်ပုံမှန် လုပ်ဆောင်ပေးသင့်ပါတယ်။

• ချစ်တင်းမနှောခင် တစ်ကိုယ်ရည် အာသာဖြေခြင်း

ချစ်တင်းနှောခြင်း ကိစ္စတွေ မလုပ်ဆောင်ခင် နာရီပိုင်းခန့် အလိုမှာ တစ်ကိုယ်ရည် အာသာဖြေခြင်းဖြင့် ချစ်တင်းနှောစဉ် သုက်ထွက်မြန်ခြင်းကို ကာကွယ်နိုင်မှာ ဖြစ်ပါတယ်။

• ကွန်ဒုံးအသုံးပြုပြီး ချစ်တင်းနှောခြင်း

ချစ်တင်းနှောနေစဉ်မှာ ကွန်ဒုံးအသုံးပြုခြင်းကြောင့် ဖိုအင်္ဂါအနေနဲ့ မအင်္ဂါနဲ့ ထဲထဲဝင်ဝင် ထိတွေ့ခွင့် မရရှိတာကြောင့် သုက်ထွက်ဖို့အတွက် အချိန်ပိုမို ကြာမြင့်သွားမှာပဲ ဖြစ်ပါတယ်။

တကယ်လို့ အထက်မှာ ဖော်ပြထားတဲ့ နည်းလမ်းတွေကို လုပ်ဆောင်ပေမယ့် သုက်လွှတ်မြန်ခြင်းကို ခံစားနေတယ် ဆိုရင်တော့ သက်ဆိုင်ရာ ဆရာဝန်နဲ့ ပြသပြီး ဆရာဝန် ညွှန်ကြားချက်အတိုင်း ဆေးဝါးတွေကို သောက်သုံးပေးသင့်ပါတယ်။

REF: HealthLine, MedicalNewsToday