အမျိုးသမီးတွေ အနေနဲ့ ဓမ္မတာလာချိန်မှာ နေထိုင်မကောင်းခြင်း၊ ကိုယ်လက်ကိုက်ခဲခြင်း၊ မောပန်းနွမ်းနယ်ခြင်းစတဲ့ ဝေဒနာတွေကို ခံစားရနိုင်တဲ့အပြင် ခေါင်းကိုက်ခြင်း၊ မိုက်ခနဲဖြစ်ခြင်းစတဲ့ ဝေဒနာတွေကိုပါ ခံစားရနိုင်ပါတယ်။ ဒါကြောင့် ဓမ္မတာလာချိန်မှာ ခေါင်းကိုက်ခြင်းကို ဖြစ်ပွားစေတဲ့ အကြောင်းအရင်းတွေကို အခုလို ဖော်ပြပေးလိုက်ရတာပဲ ဖြစ်ပါတယ်။

• Prostaglandin ဟော်မုန်းများခြင်း

Prostaglandin ဟော်မုန်းဆိုတာကတော့ ခန္ဓာကိုယ်ဇီဝဗေဒဖြစ်စဉ်တွေကို ထိန်းညှိပေးတဲ့ ဟော်မုန်းတစ်မျိုးပဲ ဖြစ်ပါတယ်။ ဒါပေမယ့် ဓမ္မတာလာချိန်မှာ အမျိုးသမီးတွေရဲ့ ခန္ဓာကိုယ်အတွင်း Prostaglandin ဟော်မုန်း ထုတ်လွှတ်မှု များပြားခြင်းကြောင့် ခန္ဓာကိုယ် နာကျင်ကိုက်ခဲမှုတွေကို ဖြစ်ပွားစေနိုင်ပါတယ်။ ဒါ့အပြင် Prostaglandin ဟော်မုန်း ပမာဏ များပြားခြင်းကြောင့် သွေးလွှတ်ကြောတွေ ကျဉ်းမြောင်းသွားပြီး‌ ခေါင်းကိုက်ခြင်း၊ မိုက်ခနဲဖြစ်ခြင်းတို့ကို ခံစားရနိုင်ပါတယ်။

• သားအိမ်ကြွက်သားများ ကျဉ်းမြောင်းသွားခြင်း

ဓမ္မတာလာချိန်မှာ သားအိမ်ကြွက်သားတွေ ကျဉ်းမြောင်းသွားတာကြောင့် နာကျင်ကိုက်ခဲမှုတွေကို ခံစားရနိုင်ပါတယ်။ ဒါ့အပြင် သားအိမ်ကြွက်သားတွေ ကျဉ်းမြောင်းသွားခြင်းကြောင့် ခေါင်းကိုက်ခြင်းကိုလည်း ဖြစ်ပွားစေနိုင်ပါတယ်။

• သွေးအားနည်းခြင်း

ဓမ္မတာလာချိန်မှာ သွေးဆင်းခြင်းကြောင့် အမျိုးသမီးတွေရဲ့ ခန္ဓာကိုယ်အတွင်းမှာ သွေးနီဥတွေ နည်းပါးသွားလေ့ရှိပြီး ခေါင်းကိုက်ခြင်း၊ မိုက်ခနဲဖြစ်ခြင်းတို့ကို ခံစားရနိုင်ပါတယ်။

• ရေဓာတ်ခမ်းခြောက်ခြင်း

ဓမ္မတာဆင်းချိန်မှာ ခန္ဓာကိုယ်တွင်း ဟော်မုန်းအပြောင်းအလဲတွေ ဖြစ်ပွားလေ့ ရှိကြပါတယ်။ ခန္ဓာကိုယ်တွင်း ဟော်မုန်းအပြောင်းအလဲတွေ ဖြစ်ပွားခြင်းကြောင့် ဓမ္မတာလာချိန်မှာ ရေဓာတ်ခမ်းခြောက်မှုကို ခံစားရလေ့ ရှိကြပါတယ်။ ရေဓာတ်ခမ်းခြောက်ခြင်းကြောင့် ခေါင်းကိုက်ခြင်း၊ မိုက်ခနဲဖြစ်ခြင်းတို့ကို ခံစားရမှာ ဖြစ်တဲ့အပြင် မူးဝေခြင်း၊ ပင်ပန်းနွမ်းနယ်ခြင်း၊ အသားအရေ ခြောက်သွေ့ခြင်းစတဲ့ ဝေဒနာတွေကိုပါ ခံစားရနိုင်ပါတယ်။

• သွေးတွင်းသကြားဓာတ် လျော့နည်းခြင်း (Hypoglycemia)

ဓမ္မတာဆင်းချိန်မှာ သွေးတွင်းသကြားဓာတ်တွေ လျော့နည်းသွားခြင်းကြောင့် အချို့သော အမျိုးသမီးတွေ အနေနဲ့ မူးဝေခြင်း၊ ခေါင်းတစ်ခြမ်းကိုက်ခြင်းတို့ကို ခံစားရနိုင်ပါတယ်။

• ဘက်တီးရီးယားပိုးဝင် သွေးဆိပ်သင့်ခြင်း (Toxic Shock Syndrome)

ဘက်တီးရီးယားပိုးဝင် သွေးဆိပ်သင့်ခြင်း ဆိုတာကတော့ အဖြစ်နည်းတဲ့ ရောဂါတစ်မျိုးပဲ ဖြစ်ပါတယ်။ ဓမ္မတလာချိန်မှာ လစဉ်သုံးပစ္စည်းတွေ အသုံးပြုပြီး လဲလှယ်ပေးခြင်း မရှိခဲ့ဘူးဆိုရင် လစဉ်သုံးပစ္စည်းကနေ တစ်ဆင့် ရောဂါပိုးကူးစက်နိုင်ပြီး ဘက်တီးရီးယားပိုးဝင် သွေးဆိပ်သင့်ခြင်းကို ဖြစ်ပွားစေနိုင်ပါတယ်။ ဘက်တီးရီးယားပိုးဝင် သွေးဆိပ်သင့်ခြင်းကို ခံစားရတဲ့ အခါမှာ -

• ခေါင်းကိုက်ခြင်း
• လည်ချောင်းနာခြင်း
• အဖျားကြီးခြင်း
• မျက်စိနာခြင်း
• အစာမကြေခြင်းစတဲ့ ဝေဒနာတွေကိုပါ ခံစားရနိုင်ပါတယ်။

REF: HealthLine