ခံတွင်းကနေ အနံ့ဆိုးတွေထွက်ခြင်းကို ကမ္ဘာ့လူဦးရေ (၂၅) ရာခိုင်နှုန်းခန့် ခံစားနေရပါတယ်။ ခံတွင်းအနံ့ဆိုးများ ထွက်ခြင်းကို အဓိက ဖြစ်ပွားစေတဲ့ အကြောင်းအရင်းကတော့ ခံတွင်းသန့်ရှင်းမှုကို ဂရုစိုက်ခြင်း မရှိတာကြောင့်ပဲ ဖြစ်ပါတယ်။ ဒီတော့ ခံတွင်းအနံ့ဆိုးများ ထွက်ခြင်းကို ဖြစ်ပွားစေတဲ့ အကြောင်းအရင်းတွေကို လေ့လာကြည့်လိုက်ရအောင်။

• ခံတွင်းသန့်ရှင်းမှုမရှိခြင်း

သွားပုံမှန်တိုက်ခြင်း မရှိခဲ့ရင် ဒါမှမဟုတ် ပါးစပ်ကို ပုံမှန်ဆေးကြောပေးခြင်း မရှိဘူးဆိုရင် စားကြွင်းစားကျန်တွေ ပါးစပ်အထဲမှာ ကျန်ရှိနေမှာဖြစ်ပြီး သွားနှင့်ခံတွင်း ကျန်းမာရေးကို ထိခိုင်စေနိုင်မှာ ဖြစ်တဲ့အပြင် ခံတွင်းအနံ့ဆိုးတွေကိုလည်း ထွက်စေမှာ ဖြစ်ပါတယ်။

• အစားအစာများကြောင့် အနံ့ဆိုးထွက်ခြင်း

အချို့သော အစားအစာတွေဖြစ်တဲ့ ကြက်သွန်ဖြူတွေ၊ ကြက်သွန်နီတွေ၊ ဟင်းခတ်အမွှေးအကြိုင်တွေ၊ အစပ်တွေကို စားသုံးခြင်းကြောင့်လည်း ခံတွင်းအနံ့ဆိုးထွက်ခြင်းကို ဖြစ်ပွားစေနိုင်ပါတယ်။

• ကော်ဖီသောက်ခြင်း

တကယ်လို့ သင့်အနေနဲ့ မနက်အိပ်ယာက နိုးထချိန်ထဲက စတင်ကာ ကော်ဖီကို သောက်သုံးခဲ့မယ်ဆိုရင် ကော်ဖီရဲ့ အနံ့အရသာ ပြင်းထန်မှုကြောင့် ခံတွင်းအနံ့ဆိုးထွက်ခြင်းကို ဖြစ်ပွားစေမှာ ဖြစ်ပါတယ်။

• အရက်သောက်ခြင်း

ခံတွင်းအနံ့ဆိုးကို ထွက်စေတဲ့ နောက်ထပ် အကြောင်းအရင်း တစ်ခုကတော့ အရက်သောက်ခြင်းကြောင့်ပဲ ဖြစ်ပါတယ်။ တကယ်လို့ အရက်ကို အလွန်အကျွံ သောက်သုံးမယ်ဆိုရင် ပါးစပ်တွင်း သွားရည်ထုတ်လုပ်မှုတွေ ကျဆင်းသွားမှာဖြစ်ပြီး အနံ့ဆိုးတွေ ထွက်ပေါ်စေတဲ့ ဘက်တီးရီးယားတွေ ပါးစပ်တွင်းမှာ ပိုမိုများပြားလာမှာ ဖြစ်ပါတယ်။

• အချိုဓာတ်လွန်ကဲတဲ့ အစားအစာများ စားသုံးခြင်း

အစပ်တွေ၊ ဟင်းခတ်အမွှေးအကြိုင်တွေ စားသုံးသလိုပဲ အချိုဓာတ်လွန်ကဲတဲ့ အစားအစာတွေ စားသုံးခြင်းကြောင့်လည်း ခံတွင်းအနံ့ဆိုးကို ထွက်စေမှာ ဖြစ်ပါတယ်။ ဒါ့အပြင် အချိုဓာတ်လွန်ကဲတဲ့ အစားအစာတွေ စားသုံးခြင်းကြောင့် သွားပိုးစားခြင်းကိုလည်း ဖြစ်ပွားစေမှာ ဖြစ်ပါတယ်။

• ပရိုတိန်းဓာတ်လွန်ကဲတဲ့ အစားအစာများ စားသုံးခြင်း

ပရိုတိန်းဓာတ်ကို ကျွန်တော်တို့ ခန္ဓာကိုယ် ကျန်းမာသန်စွမ်းဖို့ အတွက် လိုအပ်တာ မှန်ပေမယ့် ပရိုတိန်းဓာတ် လွန်ကဲတဲ့ အစားအစာတွေ စားသုံးမယ်ဆိုရင် ခံတွင်းအနံ့ဆိုးများ ထွက်ခြင်းကို ဖြစ်ပွားစေနိုင်ပါတယ်။ ပရိုတိန်းဓာတ် လွန်ကဲတဲ့ အစားအစာတွေကို အစာချေစနစ် အနေနဲ့ အလွယ်တကူ ချေဖျက်နိုင်ခြင်း မရှိတာကြောင့် မကြာခဏ လေချဉ်တက်ပြီး ခံတွင်းအနံ့ဆိုးတွေ ထွက်လာမှာ ဖြစ်ပါတယ်။

• ဆေးလိပ်သောက်ခြင်း

ဆေးရွက်ကြီး ပါဝင်တဲ့ ဆေးလိပ်တွေ၊ ဆေးတံတွေ သောက်သုံးခြင်း၊ ဆေးရွက်ကြီး ငုံခြင်းကြောင့် ခံတွင်းကျန်းမာရေးကို ထိခိုက်စေမှာ ဖြစ်တဲ့အပြင် ခံတွင်းအနံ့ဆိုးတွေကို ထွက်စေမှာ ဖြစ်ပါတယ်။

ဒါ့အပြင် ခံတွင်းခြောက်ခြင်း၊ ဖျားနာခြင်း၊ ဆီးချိုဖြစ်ခြင်း၊ အသည်းရောဂါဖြစ်ပွားခြင်း၊ ကျောက်ကပ်ရောဂါဖြစ်ပွားခြင်း၊ အသက်ရှူလမ်းကြောင်းဆိုင်ရာ ရောဂါများ ခံစားနေရခြင်း၊ ကင်ဆာရောဂါ ခံစားနေခြင်းတို့ကြောင့်လည်း ခံတွင်းအနံ့ဆိုးများ ထွက်ခြင်းကို ဖြစ်ပွားစေနိုင်ပါတယ်။

REF: Listerine