အစာမကြေ ဝေဒနာကို လူတိုင်းနီးပါး ခံစားဖူးကြမယ် ထင်ပါတယ်။ တကယ်တော့ အစာမကြေခြင်းဆိုတာ ရောဂါတစ်မျိုးတော့ မဟုတ်ပါဘူး။ အစားမှားတဲ့အခါမှာ ဒါမှမဟုတ် အစာအိမ်နဲ့ အူလမ်းကြောင်းမှာ ပြဿနာ တစ်ခုခု ရှိနေတဲ့ အခါတွေမှာ အစာမကြေခြင်းကို ဖြစ်ပွားစေနိုင်ပါတယ်။ ဒီတော့ အစာမကြေခြင်းကို ဖြစ်ပွားစေတဲ့ အကြောင်းအရင်းတွေကို လေ့လာကြည့်လိုက်ရအောင်။

အစာမကြေ ဝေဒနာကို ခံစားရတဲ့ အခါမှာ :

• မအီမသာဖြစ်ခြင်း
• အော့အန်ခြင်း
• လေပွခြင်း
• ဗိုက်အောင့်ခြင်း
• မူးဝေခြင်း
• ရင်ပြည့်ရင်ကယ်ဖြစ်ခြင်း
• မကြာခဏ လေလည်ခြင်း
• လေချဉ်တက်ခြင်းစတဲ့ ဝေဒနာတွေကို ခံစားရနိုင်ပါတယ်။

တကယ်လို့ သင့်အနေနဲ့ အမြဲတမ်းနီးပါး အစာမကြေ ဖြစ်နေတဲ့အပြင် :

• မကြာခဏ အော့အန်ခြင်း
• သွေးအန်ခြင်း
• ရုတ်တရက် ကိုယ်အလေးချိန် ကျဆင်းခြင်း
• အစာမျိုရခက်ခဲခြင်း
• ဝမ်းအမဲများသွားခြင်းစတဲ့ ရောဂါဝေဒနာတွေကို ခံစားနေရတယ် ဆိုရင်တော့ အမြန်ဆုံး သက်ဆိုင်ရာ ဆရာဝန်နဲ့ သွားရောက်ပြသင့်ပါတယ်။

 အစာမကြေခြင်း ဝေဒနာကို လူကြီး၊ လူငယ် ကျား၊မ မရွေး ခံစားရနိုင်ပါတယ်။ အစာမကြေခြင်းကို ဖြစ်စေနိုင်တဲ့ အကြောင်းအရင်းတွေကတော့ အောက်ပါအတိုင်းပဲ ဖြစ်ပါတယ်။

• အစာအိမ်မှာပြည်တည်ခြင်း
• အစာအိမ် အချဉ်ပြန်တက်ခြင်း
• အဝလွန်ခြင်း
• အစာအိမ်မှ အစာထွက်နှေးခြင်း
• အစာအိမ်မှာ ပိုးဝင်ခြင်း
• အဆီများတဲ့ အစားအစာတွေ စားသုံးခြင်း
• အရက် အလွန်အကျွံ သောက်သုံးခြင်း
• ဆေးလိပ်သောက်ခြင်း

ဒါ့အပြင် အချို့သော ဆေးဝါးတွေ သောက်သုံးခြင်းကြောင့်လည်း အစာမကြေခြင်းကို ဖြစ်ပွားစေနိုင်ပါတယ်။ အစာမကြေခြင်းကို ဖြစ်ပွားစေတဲ့ ဆေးဝါးတွေကတော့ အောက်ပါအတိုင်းပဲ ဖြစ်ပါတယ်။

• အကိုက်အခဲပျောက်ဆေးများ
• သန္ဓေတားဆေးများ
• အချို့သော ပဋိဇီဝဆေးများ
• Thyroid ရောဂါ ကာကွယ်ဆေးများ

တကယ်လို့ သင့်အနေနဲ့ အစာမကြေခြင်း ဝေဒနာ ဖြစ်ပွားမှုကို ကာကွယ်ချင်တယ် ဆိုရင်တော့ ဖော်ပြပါ နည်းလမ်းတွေကို လိုက်နာကျင့်သုံးသင့်ပါတယ်။

• အစာကိုကြေညက်အောင် ဝါးစားခြင်း
• အစာစားနေစဉ် ဖျော်ရည်များ သောက်သုံးမှုကို ရှောင်ကြဉ်ခြင်း
• အစာစားပြီးတိုင်း သက်တောင့်သက်သာ အနားယူခြင်း
• အစပ် အလွန်အကျွံ စားသုံးခြင်းကို ရှောင်ကြဉ်ခြင်း
• ဆေးလိပ်ဖြတ်ခြင်း
• အရက်ဖြတ်ခြင်း

ဒါ့အပြင် ဗိုက်ပြည့်နေတဲ့ အချိန်မှာ လေ့ကျင့်ခန်း ပြုလုပ်ခြင်းကို ရှောင်ကြဉ်ခြင်း၊ တင်းကျပ်တဲ့ အဝတ်အစားများ ဝတ်ဆင်ခြင်းကို ရှောင်ကြဉ်ခြင်း၊ မအိပ်ခင် အစာစားခြင်းကို ရှောင်ကြဉ်ခြင်း၊ ကဖိန်းဓာတ် ပါဝင်တဲ့ သောက်စရာများ အလွန်အကျွံ သောက်သုံးမှုကို ရှောင်ကြဉ်ခြင်းတို့ဖြင့် အစာမကြေဝေဒနာ ခံစားရမှုကို ကာကွယ်နိုင်မှာ ဖြစ်ပါတယ်။

REF: WebMD, HealthLine