အရိုးအဆစ်တွေ ကြံ့ခိုင်သန်စွမ်းစေဖို့ အတွက် ကယ်ဆီယမ်နဲ့ ဗီတာမင် D ကိုအဓိက အနေနဲ့ လိုအပ်ပါတယ်။ ကယ်ဆီယမ် အနေနဲ့ အရိုးအဆစ်နဲ့ သွားများကို ကြံ့ခိုင်သန်စွမ်းစေဖို့ အဓိက အနေနဲ့ အထောက်အကူ ပေးလျက်ရှိပြီး ဗီတာမင် D အနေနဲ့ ကယ်ဆီယမ်ကို စုပ်ယူနိုင်ဖို့နဲ့ အရိုးအဆစ်တွေ ကြီးထွားစေဖို့ ကြီးမားတဲ့ အထောက်အကူကို ပေးလျက်ရှိပါတယ်။

အရိုးအဆစ်တွေ ကြံ့ခိုင်သန်စွမ်းခြင်း မရှိဘူးဆိုရင် အရိုးကျိုးလွယ်ခြင်း၊ အရိုးပွခြင်း၊ အရိုးပျော့ခြင်း၊ အရိုးကင်ဆာ ဖြစ်ပွားခြင်းစတဲ့ ဝေဒနာတွေကို ခံစားရနိုင်ပါတယ်။ ဒါကြောင့် အရိုးအဆစ်တွေ ကြံ့ခိုင်သန်စွမ်းစေဖို့ အတွက် စားသုံးသင့်တဲ့ အစားအစာတွေကို အခုလို ဖော်ပြပေးလိုက်ရတာ ဖြစ်ပါတယ်။

• ဒိန်ချဉ်

အရိုးအဆစ်တွေ ကြံ့ခိုင်သန်စွမ်းစေဖို့ လိုအပ်တဲ့ ဗီတာမင် D ကို နေရောင်ခြည်ကနေ တစ်ဆင့် ရရှိနိုင်သလို ဒိန်ချဉ်ကနေ တစ်ဆင့်လည်း ရရှိနိုင်ပါတယ်။ ဒါ့အပြင် ဒိန်ချဉ်မှာ ကယ်ဆီယမ်ဓာတ်လည်း ပါဝင်တာကြောင့် နေ့စဉ်ပုံမှန် စားသုံးသင့်ပါတယ်။

• နွားနို့

နွားနို့မှာ ကယ်ဆီယမ်ဓာတ် ကြွယ်ဝစွာ ပါဝင်ပါတယ်။ ဒါကြောင့် အရိုးအဆစ်တွေ ကြံ့ခိုင်သန်စွမ်းစေဖို့ အတွက် တစ်နေ့ကို နွားနို့ သုံးခွက်ခန့် သောက်သုံးပေးသင့်ပါတယ်။

• ဒိန်ခဲ

ဒိန်ခဲမှာ ကယ်ဆီယမ်ဓာတ် ကြွယ်ဝစွာ ပါဝင်တာကြောင့် အရိုးအဆစ်နဲ့ သွားများကို ကြံ့ခိုင်သန်စွမ်းစေမှာ ဖြစ်ပါတယ်။ ဒါပေမယ့် ဒိန်ခဲမှာ ကယ်ဆီယမ်ဓာတ် ကြွယ်ဝစွာ ပါဝင်သလို ကယ်လိုရီတွေလည်း ကြွယ်ဝစွာ ပါဝင်တာကြောင့် အဝလွန်ခြင်း၊ သွေးပေါင်တက်ခြင်းတို့ကို ဖြစ်ပွားစေနိုင်တဲ့အပြင် ဒိန်ခဲမှာ အမျှင်ဓာတ် ပါဝင်ခြင်း မရှိတာကြောင့် အလွန်အကျွံ စားသုံးမယ်ဆိုရင် ဝမ်းချုပ်ခြင်းကိုလည်း ဖြစ်စေနိုင်ပါတယ်။

•  ဆာဒင်းငါး (ငါးသေတ္တာငါး)

ငါးသေတ္တာငါးမှာ ဗီတာမင် D နဲ့ ကယ်ဆီယမ်တို့ ကြွယ်ဝစွာ ပါဝင်တာကြောင့် ပုံမှန်စားသုံးပေးခြင်းဖြင့် အရိုးအဆစ်တွေကို ကြံ့ခိုင်သန်စွမ်းစေမှာ ဖြစ်ပါတယ်။ ဒါ့အပြင် ငါးသေတ္တာငါးမှာ အိုမီဂါ (3) ဖက်တီးအက်စစ် ပါဝင်တာကြောင့် နှလုံးရောဂါဖြစ်ပွားခြင်း၊ သွေးခဲခြင်းစတဲ့ ရောဂါဝေဒနာတွေ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။

• ဥများ

ကြက်ဥ/ ဘဲဥတွေကို နေ့စဉ်ပုံမှန် စားသုံးပေးခြင်းဖြင့် အရိုးအဆစ်တွေ ကျန်းမာသန်စွမ်းစေဖို့အတွက် လိုအပ်တဲ့ ဗီတာမင် D ကို ရရှိနိုင်မှာ ဖြစ်ပါတယ်။ ဒါ့အပြင် ဥတွေမှာ ပရိုတိန်းဓာတ် ကြွယ်ဝစွာ ပါဝင်တာကြောင့် ခန္ဓာကိုယ်ကြွက်သားများကို ကြီးထွားသန်မာစေမှာ ဖြစ်သလို အရိုးကျန်းမာရေးကိုလည်း ကောင်းမွန်စေမှာ ဖြစ်ပါတယ်။

• ဆဲလ်မွန်ငါး

ဆဲလ်မွန်ငါးမှာ အိုမီဂါ ၃ ဖက်တီးအက်စစ် ကြွယ်ဝစွာ ပါဝင်တဲ့အပြင် ဗီတာမင် D ကြွယ်ဝစွာ ပါဝင်တာကြောင့် အရိုးအဆစ်တွေကို ကျန်းမာသန်စွမ်းစေမှာ ဖြစ်သလို နှလုံးကျန်းမာရေးကိုလည်း ကောင်းမွန်စေမှာ ဖြစ်ပါတယ်။

• ဟင်းနုနွယ်ရွက်

နို့နှင့်နို့ထွက်ပစ္စည်းတွေ၊ အသားငါးတွေ စားသုံးရတာကို နှစ်သက်ခြင်း မရှိပေမယ့် အရိုးအဆစ်တွေကို ကြံ့ခိုင်သန်စွမ်းချင်တယ် ဆိုရင်တော့ ဟင်းနုနွယ်ရွက်ကို စားသုံးပေးသင့်ပါတယ်။ ဟင်းနုနွယ်ရွယ်မှာ ကယ်ဆီယမ်ဓာတ် ကြွယ်ဝစွာ ပါဝင်တဲ့အပြင် အမျှင်ဓာတ်၊ သံဓာတ်၊ ဗီတာမင် A တို့ပါဝင်တာကြောင့် ခန္ဓာကိုယ် ကျန်းမာရေးအတွက် ပုံမှန်စားသုံးပေးသင့်ပါတယ်။

REF: Health