ရာသီအပြောင်းအလဲတွေ၊ ဖျားနာတုပ်ကွေး ရောဂါတွေ ခံစားရတဲ့ အခါမှာ နှာချေခြင်း၊ ချောင်းဆိုးခြင်းစတဲ့ ဝေဒနာတွေကို ခံစားရလေ့ ရှိပါတယ်။ ဒါပေမယ့် အထက်မှာ ဖော်ပြထားတဲ့ အကြောင်းအရင်းများကြောင့် မဟုတ်ပဲ မကြာခဏ နှာချေခြင်းကို ဖြစ်ပေါ်စေတဲ့ အခြားသော အကြောင်းအရင်းတွေလည်း ရှိပါသေးတယ်။ ဒီတော့ မကြာခဏ နှာချေရခြင်းရဲ့ အကြောင်းအရင်းတွေကို တစ်ချက်လောက် လေ့လာကြည့်လိုက်ရအောင်။

• ဓာတ်မတည့်ခြင်း

မကြာခဏ နှာချေခြင်းကို ဖြစ်ပွားစေတဲ့ အဓိက အကြောင်းအရင်းကတော့ ဓာတ်မတည့်ခြင်းကြောင့်ပဲ ဖြစ်ပါတယ်။ ဝတ်မှုံနဲ့ ဓာတ်မတည့်ခြင်း၊ ဖုန်မှုန့်တွေရှူမိခြင်း၊ တိရစ္ဆာန်အမွေးတွေ ရှူမိခြင်းစတဲ့ အချက်တွေကြောင့်လည်း မကြာခဏ နှာချေခြင်းကို ဖြစ်ပွားစေပါတယ်။ တစ်ခါတရံမှာ နို့နှင့်နို့ထွက်ပစ္စည်းတွေနဲ့ ဓာတ်မတည့်ခြင်းကြောင့်လည်း မကြာခဏ နှာချေခြင်းကို ဖြစ်ပွားစေနိုင်ပါတယ်။

• ထိပ်ကပ်နာရောဂါ ဖြစ်ပွားခြင်း

ထိပ်ကပ်နာ ဖြစ်ပွားတဲ့အခါမှာ နှာရေယိုခြင်း၊ နှာပိတ်ခြင်း၊ ကိုယ်ပူခြင်း၊ ဖျားနာခြင်း၊ မောပန်းနွမ်းနယ်ခြင်းစတဲ့ ရောဂါဝေဒနာတွေကို ခံစားရနိုင်သလို မကြာခဏ နှာချေခြင်းကိုလည်း ဖြစ်ပွားစေနိုင်ပါတယ်။ တကယ်လို့ သင့်အနေနဲ့ ထိပ်ကပ်နာရောဂါကို ခံစားနေရမယ်ဆိုရင် ပါရာစီတမော သောက်သုံးပေးခြင်း၊ ရေနွေးငွေ့ ရှူပေးခြင်းဖြင့် အလွယ်တကူ သက်သာပျောက်ကင်းစေမှာ ဖြစ်ပါတယ်။

• ဆေးဝါးများကြောင့် မကြာခဏနှာချေခြင်း

တချို့သော ဆေးဝါးတွေကို သောက်သုံးတဲ့ အခါမှာ အာရုံကြောကို ထိခိုက်စေနိုင်တာကြောင့် မကြာခဏ နှာချေခြင်းကို ဖြစ်ပွားစေပါတယ်။ အထူးသဖြင့် သွေးပေါင်ကျဆေးတွေ၊ အကိုက်အခဲပျောက်ဆေးတွေ၊ အဖျားပျောက်ဆေးတွေကို သောက်သုံးတဲ့အခါမှာ မကြာခဏ နှာချေခြင်းကို ဖြစ်ပွားစေပါတယ်။

• နှာခေါင်းတွင်း အသားပိုထွက်ခြင်း

တကယ်လို့ နှာခေါင်းတွင်းမှာ အသားပို ရှိနေမယ်ဆိုရင် မကြာခဏ နှာချေခြင်း၊ နှာရေယိုခြင်း၊ နှာခေါင်းတစ်ဝိုက် ယားယံခြင်းတို့ကို ဖြစ်ပွားစေနိုင်ပါတယ်။

• လေထုညစ်ညမ်းခြင်း

မော်တော်ယာဉ်တွေက ထုတ်လွှတ်တဲ့ မီးခိုးငွေ့တွေ၊ စက်ရုံတွေက ထုတ်လွှတ်တဲ့ မီးခိုးငွေ့တွေကို ရှူရှိုက်မိခြင်းကြောင့်လည်း မကြာခဏ နှာချေခြင်းကို ဖြစ်ပွားစေနိုင်ပါတယ်။ ဒါ့အပြင် လေထုညစ်ညမ်းခြင်းကြောင့် မကြာခဏ နှာချေခြင်းအပြင် အခြားသော ရောဂါဝေဒနာပေါင်းများစွာကို ခံစားရနိုင်ပါတယ်။

• အရက်သောက်သုံးခြင်း

အရက်ဘီယာတွေမှာ ပါဝင်တဲ့ အယ်လ်ကိုဟောဓာတ်ကြောင့်လည်း မကြာခဏ နှာချေခြင်း၊ နှာရေယိုခြင်းကို ဖြစ်ပွားစေနိုင်ပါတယ်။ ဒါ့အပြင် အပူ၊ အစပ်တွေ လွန်ကဲတဲ့ အစားအစာတွေ စားသုံးခြင်းကြောင့်လည်း မကြာခဏ နှာချေခြင်းကို ဖြစ်ပွားစေနိုင်ပါတယ်။

• ဟော်မုန်းပြောင်းလဲခြင်း

ကိုယ်ဝန်ဆောင်ချိန်မှာ၊ ရာသီသွေးဆင်းချိန်မှာ ဟော်မုန်းပြောင်းလဲခြင်းကြောင့် မကြာခဏ နှာချေခြင်းကို ဖြစ်ပွားစေနိုင်ပါတယ်။ ဒါ့အပြင် ကိုယ်ဝန်တားဆေးတွေ သုံးစွဲခြင်းကြောင့်လည်း မကြာခဏ နှာချေခြင်းကို ဖြစ်ပွားစေနိုင်ပါတယ်။

REF: TheHealthy, MayoClinic